Agar Episode 1 ne aapko meri toot-ti hui zindagi ki pehli jhalak dikhai hai… to Episode 2 aapko us daur tak le jayega jahan khwabon ka mehall sach-much zameen boss ho gaya.
Ye woh saal thay jahan jazbat ne faisle karwaye… aur haqeeqat ne in faislon ki asal qeemat samjhayi. Aaj ki episode unhi pehle do saalon ki kahani hai… jis mein har dukhi larki ko, har preshan mom ko, har stress se guzarti aurat ko apne aap ki parchai dekhay gi.
Shadi – Jab Khwabon Ka Mehal Zameen Boss Hua
Mai soch bhi nahi sakti thi ke meri marzi ki shadi… meri zindagi ka sabse dardnaak morh ban jayegi. Meri B.Sc final year chal rahi thi jab meri pehli dafa “in” (husband) se baat hui… Ek aisa shakhs jisko khandan ke watta-satta riwaaj ki wajah se rishta nahi milta tha, Na unki behan thi, na bohat wajahat, na zyada taleem, na achi naukri, na jaidad.
Aur mera dil pighal gaya. Maine socha, “Shadi aik din honi hai… kyun na Allah ke liye aik aise bnde ka saath du jiska koi saath nahi de raha?” Lekin ye faisla… meri zindagi ki sabse bari qurbani ban gaya. Ghar wale raazi nahi the. Unko razi karne ke liye mujhe aik kaghaz par likh kar dena pada:
“Agar aage zindagi mein kuch bura hua, iski zimmedar main khud hoon… mere maa baap nahi.”
Us kagaz ka bojh us waqt halka laga… magar aaj bhi uski lakeerein mere dil par naqsh hain.
Shadi ke Baad Jo Dekha… Wo Hila Dene Wala Sach Tha
Shadi ke doosre din hi mene husband ka gussa dekh liya… Phir laga shaayad waqt ki preshani hogi.
Mujhe yakeen tha: “Jis ke liye maine sab kuch risk kiya hai… wo kabhi mere sath bura nahi karega.” Lekin ye meri sabse bari bhool thi. Dono taraf se umeedein toot rahi thin, main sochti thi mene shadi kr ke in (husband) pr ehsan kiya hai, wo sochte honge ke jis ne mere liye itna kiya hai wo hamesha qurbaniyon per qaim rahegi, Dono umeedon ke tootne se sapno ke sheesh mehal mein dararh aa gai.
💔 Emotional Breakdown
Jab soch, adat, mizaj, sab kuch 90 degree opposite nikla… mai toot gai.
Panic attacks start ho gaye. Gaon ke attaai ne keh diya: “Larki per saya hai.” Taweez-dhagay shuru honay wale the jab aik Allah wala ne pehchaan liya: “Ye saya nahi… dimaag ko shock laga hai. Ye stress se toot rahi hai.”
Counseling shuru hui. Mere walid ne samjha-bujha kar mujhe sambhala. Aur is be-rang daur mein aik cheez ne mera rishta bachaya: Meri saas aur susar ka pyar. Susar to kabhi kabhi mere liye mere shohar ki “dhulaai” tak kar dete the.
📚 Sabaq (Lesson #1):
“Parents duniya dekh chuke hote hain. Unki baat sun leni chahiye—kyunke jahan hum sirf jazbat dekhte hain, wo wahan zindagi ka asliyat dekh lete hain.”
Marzi ki shadi har baar buri nahi hoti, lekin parents par bharosa zyada behtar hota hai… kyunke unki nazar un oonchi seedhiyon tak pohanch chuki hoti hai jahan hum abhi pehla qadam rakhte hain.
Pehli Beti Ki Aamad – Roshni Bhi… Zimmedari Bhi
13 November 2011… Jis din pehli beiti paida hui, mere aangan mein bahaar aa gayi. Main ussey goad mein uthaye har dard bhool gayi. Lekin halat wohi thay… Husband jobless. Ghar ke kharch sirf ami abu ke paison se chal rahe thay. Daal-roti mushkil se chalti thi.
Phir ek aur imtihaan:
4 mahine ki beti goad mein… aur mujhe B.Sc repeat karni thi.
12 books.
Nai nai maa.
Ghar ki zimmedari.
Aur phir exams.
Lekin Allah ne meri saas aur ami ko mere bazu bana diya. Woh bachi ko sula kar pakar lete. Main paper dene jati. Magar bachi ka har kaam main hi karti thi. Saas susar chahtay thay ke main parhon, aage barhon, kisi ohde per lag jaun… Unko lagta tha B.Sc bohat barhi degree hai jo “ohda” dila degi. Unki mohabat sachchi thi… bas samaj kam thi. 2012 mein jab maine BSc clear ki… Us din pehli baar mujhe laga:
“Main toot kar bhi uth sakti hoon.”
📚 Sabaq (Lesson #2):
“Agar Allah kisi ko maa bana deta hai… to uske andar ek aisi quwwat rakh deta hai jo pahaarh bhi hila sakti hai.” Har mom strong hoti hai—chahe duniya usse kamzor samjhe.
B.Sc Clear – Magar Zindagi Abhi Bhi Fail Ho Rahi Thi
Academic degree clear ho gayi… Lekin zindagi ka imtihaan abhi chal raha tha. Ghar ke halat, shohar ka jobless rehna, zimmedariyan barhna, kharche badhna… aur mere andar ka aik hissa roz thoda thoda marr raha tha. Aur yahan se meri asli kahani shuru hoti hai.
Agle episode mein hum aage chal kar dekhain ge ke kaise 2012 ke baad zindagi ne naye pech-o-taab liye… kaise doosri beiti aayi… kaise Lahore shift hona parha… kaise gaon ne meri sehat aur rooh ko dobara torh diya…
Lekin aaj ki episode yahin tak. Ye do saal meri zindagi ke sabse kathin, sabse mohim joo saal thay.
📚 Final Sabaq (Lesson #3):
“Zindagi aksar humein wapis usi jagah gira deti hai jahan se hum ne sapne banaye thay. Lekin agar gir kar uthne ka hausla ho… to Allah ek din woh sapna haqeeqat bana deta hai.”
Episode 3 Teaser
Agar ap aage ki kahani mein mere saath chlna chahein to mujhe follow kren Insha’Allah jald mulaqat hogi…
Aage ki kahani…. “2012–2014 ka daur… Lahore ki zindagi, meri doosri beti, aur woh saal jahan meri sehat, meri rooh aur mera sabr ek bohat barha imtihaan guzra.”