Meri Zindagi… Toota Hua Aaghaz, Magar Ek Maqsad Bhara Safar
Zindagi ne mujhe kabhi seedha raasta nahi diya. Mere bachpan se lekar jawani tak, main ne aise mod dekhe jahan aksar log toot kar reh jaate hain. Lekin mujhe shayad Allah ne ek alag hi rawani di thi — main toot kar rukti nahi thi… main dobara uth kar chal parhti thi.
Aaj main apni journey share kar rahi hoon, kyunki shayed meri kahani kisi aur aurat ka hausla ban jaye.
Kyunki main maanti hoon:
“Aurat dariya hai — isey koi rok nahi sakta isko apna raasta bnana aata hai.”
Chapter 1: Mera Bachpan – Jahan Se Tootna Shuru Hua
Mera bachpan woh haseen tasveer nahi tha jaisa aksar logon ka hota hai. Mere liye bachpan aik imtihan se kam na tha. Ghar me 9 behan bhaio me 3rd last, 5 behno me 5th behan or 2 bhai mujhse choty thy.
Brhy behan bhaio ki used cheezen miltin, kitabon se le kar chotte hue kaprhon aur jooton tak… Bohat dil chahta ke kabhi apni mrzi ki shopping krun, naya bag, naye kaprhy, aur jooty kharidoon but ____.
Class fellows jab new cheeze le kar meri purani cheezo par taunt krtin to mera chota sa dil toot kar reh jata.
In baato ne Mujhy choti si umar mein hi samjha diya ke zindagi aasaan nahi hoti.
Sarkari school ka mahaul, logon ki awaazein, study ka pressure — sab behan bhai topper or mai average student ye to dard hi alag tha.
Sone par sohaaga jab brhi behno ke laayeq hone ki waja se teachers mujhy target krtin uski pain aur insult aaj tk nahi bhoolti.
Main khamoshi mein bahut kuch seekh chuki thi.
Dard ko chhupana, Mazboot rehna, aur har cheez ko khud samajhna.
Kabhi kabhi lagta tha ke main ek ajeeb si tanha duniya mein hoon. Lekin iss tanhai ne mujhe todne ke bajaye mujhe aur mazboot banaya.
Aaj sochti hoon…
Agar mera bachpan smooth hota, shayed main aaj itni strong na hoti.
Chapter 2: Jawani Ka Mod – Jab Zindagi Ne Sawaal Kiye
Mera dehan games or extra curricular activities mein tha study to bas mai pass hone ke liye krti thi.
Mene uss waqt bhi dikhaya ke mai rukne wali nahi raasty bnany wali hu yani Mai to Dariya hu jo rukawto ko bahaa le jaye.
Mai games mein topper bani, gymnastic aur cycling mein 3 saal infradi inaam jeety aur college mein bhi cycling ke sath sath speech mein bhi apna talent dikhaya.
Jawani mein qadam rakhtay hi Zimmedariyan barh gayin, emotional pressure bhi barh gaya. Kyunki study ke doraan hi meri shadi hogai.
Lekin yahi wo waqt tha jab main ne pehli baar apni asli strength ko mehsoos kiya.
Shadi hui to 1 saal bad Beiti bhi peida hogai, but mai kahan rukne wali thi mai to Dariya hun. 4 maah ki bachi goad mein liye BS.c repat kr ke clear ki or degree li Alhamdulillah.
Shadi pasand ki hone ke bawjood married life koi phoolo ki seij nhi thi balke zindagi ka sab se barha Imtihan thi.
Har achi housewife ki tarah mai bhi izzat or ikhlaas ke sath bache paida kr rhi thi. 3 beitiyan hogaien, to mujhy ehsas hua bchion ke achy future ke liye hmary wasayel mehdood hain.
Maine khud se kaha:
“Nabeela, agar halaat tujhe baar baar girayen ge to tujhe baar baar uthna bhi hoga. Tu dariya hai Rukna nahin rasta bnana hai.”
Chapter 3: Pehla Qadam – Jab Purpose Ne Josh Diya
Zindagi mein aik point aisa atta hai jab insan ko achanak ehsaas hota hai:
“Main is duniya mein sirf guzarnay ke liye nahi aayi, mujhe kuch karna hai.”
Mera woh ehsaas bhi dard se hi paida hua. Main har roz sochti thi:
Main kaun hoon kaya hoon?
Meri zindagi ka maqsad kya hai?
Mera talent kya hai?
Main samaaj ke liye kya kar sakti hon?
Mere andar se jawab mila “Mera dunia mein aane ka maqsad hai dunia ko aakhrat bnane ke liye jeena”
So mene apna end goal decide kia “Mujhe dunia o aakhrat mein kamyaab hona hai”
Us waqt mere paas paisa bahut kam tha… lekin hausla bohat zyada.
Maine YouTube, free courses, har us cheez se seekhna shuru kiya jo mujhe mil sakti thi. Kisi ne guide nahi kiya. Kisi ne motivate nahi kiya. Kisi ne appreciate nahi kiya. Lekin main phir bhi seekh rahi thi… Kyuki andar se awaaz aati thi:
“Nabeela, tu ruk nahi sakti Tu dariya hai tujhy behna hai sab rukawto se larh ja.”
Chapter 4: Jab Main Ne Rasta Khud Banaya
Maine kabhi kisi se competition nahi kiya. Main sirf apne kal se behtar ban’na chahti thi. Main girti bhi thi, galtiyan bhi hoti thin, kabhi kabhi foran haar maan lenay ka dil bhi chahta tha… Lekin har dafa main ne khud ko uthaya aur chalti rahi.
Dariya ki tarah… jo chattaan, pathar, har tarah ki rukawat dekhta hai — magar rukta nahi.
Main samajh gayi thi:
“Zindagi unhi ko rasta deti hai jo chalna band nahi karte.”
Mene slogan bnaya
“Ham badlen ge to badle gi dunia, Hame Badlna hai, Ham badal den ge”
Chapter 5: MomCare – Meri Dard Se Nikli Dua
Ek waqt aisa aaya jab main ne faisla kiya:
“Main sirf apni life nahi badalungi… main dusron ki life bhi badalungi insha’Allah.”
Aur isi soch se MomCare ka janam hua. MomCare mere liye business nahi — meri zindagi ka mission hai.
Iske peeche:
meri takleef bhi hai, meri dua bhi hai, aur meri niyyat bhi.
Main chahti hoon ke Pakistan ki har aurat empowered ho, healthy, safe, natural products use kare — bina toxins, bina chemical ke apne bchon ki parwarish karey aur khud ke sath sath dusron ko badlne ke qabil bhi ho.
Main chahti hoon ke har middle-class urat apna business start kar sake.
Main chahti hoon koi aur aurat us tanhai se na guzre jisse main guzri.
“MomCare sirf meri Duaon ka jawab nahi… MomCare dusri aurton ke sapnon ka raasta hai.”
Chapter 6: Tootnay Se Uthnay Tak — Aaj Jo Main Hoon
Aaj jab main apna safar pichay murh kar dekhti hoon, mujhe ek baat samajh aati hai:
Allah ne har dard kisi wajah se diya. Har rukawat ne mujhe sikhaya. Har tootna mujhe banata gaya. Mujhe ab samajh aata hai ke agar main toot kar na girti… toh shayed main kabhi upar uthne ka soch hi na pati.
Allah Pak Quran mein Farmata hai na…
○فَاِنَّ مَعَ الۡعُسۡرِ یُسۡرًا ۙ
پس یقیناً مشکل کے ساتھ آسانی ہے ۔
○اِنَّ مَعَ الۡعُسۡرِ یُسۡرًا
بیشک مشکل کے ساتھ آسانی ہے ۔
Surat No 94 : سورة الشرح – Ayat No 5-6
Aaj main apni journey share kar rahi hoon taake:
Koi aur aurat bhi yeh samajh le ke woh akeli nahi hai, aur woh bht kuch kar sakti hai.
Conclusion: Mera Paigam Har Aurat Ke Naam
Agar aap yeh parh rahi hain…
agar aap bhi tootay hue khaab liye baithi hain… agar aap ne bhi zindagi se bohat kuch seh liya hai, seekh lia hai… To meri taraf se sirf aik baat yaad rakhein:
“Aap dariya hain, Aap rukawaton se nahi dartin, Aap apna rasta khud banati hain.”
Aap chahain tou apni zindagi ka matlab, apna mission, apni qudrat — sab kuch dobara likh sakti hain.
Episode 1 bas shuruaat hai.
InshaAllah Aagey main woh moarh share karungi jis ne meri puri zindagi badal di.
Agar aap chahein to meri kahani ki agli iqsaat mein mere saath jurh skti hain, Insha’Allah apko himmat or hosla mily ga inspiration mily gi, or ap bhi seekh len gi gir kr uthna, haar kr jeetna or rukawto ko dariya ki tarah rasta bnaty huy door krna… mera sath dene ke liye join kren Themomcare.com ke sabhi socail media plateforms ko or ban jaiye hissa ek nai roshni ka.